محتويات
قصيدة: الجهل قال للصنايعي
قال الشاعر بيرم التونسي:
الجهل قال للصنايعي
- اخلف المواعيد
وقول لهم بعد بكرة
- وبعد بكرة، عيد
واحلف لهم بالطلاق
- إن القديم دا جديد
تفوت عليه السنة
- يقعد يِنِشّ وحيد
ويبتدي الفقر
- والأمراض والتشريد
في مرة يسرح بقفة
- يا حمش ويا لذيذ
ويوم يبيع يا نصيب
- إن كان صنعه تفيد
ويوم في عركة العسا
- كر يسحبوه في حديد
ولما ينصاب برا
- جعة أو بتيفوئيد
تقول أُمه: دي عين
- حطت عليك يا بعيد.
قصيدة: ظلموني الناس ظلموني
ظلموني الناس ظلموني والجاني فاتوه وتهموني
- ظلموني الناس ظلموني والحق معايا وسقوني
من أساهم و لاحنوا علي ضعف ضنايا
- والدنيا على مساعداهم وأنا قلبي كبير ولآلي نصير
ولا أملك غير دمع عيوني ظلموني الناس
- الظالم يعينوه على ظلمه ويزيدوا المسكين على همه
الحق أهو باين في إيدي ويقولوا دا الحق علي
- والناس قاسيين على المساكين
حاربوني الكل وغلبوني
- ظلموني الناس
سلمت إليك أمري يا ربي
- غيرك ما لقيت يرحم غلبي
اليأس تعنيه من فضلك
- واليائس تنظر له بعدلك
أنا صنع إيديك واتكالي عليك
- انصرني على اللي ما نصفوني
ظلموني الناس.
قصيدة: الأولى آه والتانية آه والتالتة آه
الأولى آه والتانية آه والتالتة آه
- الأولى عيروني إن أنا فلاح
والتانية أزرع وأقلع اللي نام وارتاح
- والتالتة آه للي أحبه شط منى وراح
الأولى عيروني أن أنا فلاح، بدفية
- والتانية أزرع وأقلع اللي نام وارتاح، في دهبية
والتالتة آه اللي أحبه شط مني وراح، في صبحية
- الأولى عيروني أنه أنا فلاح بدفية، وعيشي حاف
والتانية أزرع وأقلع اللي نام وارتاح في دهبية، بمقداف
- والتالتة آه اللي أحبه شط مني وراح في صبحية، ما قال لي عواف
الأولى مش بإيدي دا قضا محتوم
- والتانية ومسيرها ناس تغرق وناس حتعوم
والتالتة ميت هم يرحل ألف هم يدوم
- الأولى آه والتانية آه والتالتة آه.
قصيدة: أنا في انتظارك خليت ناري في ضلوعي وحطيت
أنا في انتظارك خليت ناري في ضلوعي وحطيت
- ايدي على خدي وعديت
بالثانية غيابك ولا جيت
- يا ريتني عمري ما حبيت
عايز أعرف لا تكون غضبان
- أو شاغل قلبك إنسان
خليتني من يأسي أقول الغيبة دي تغيب على طول
- وأتفكر إيه اللي جنيت من ذنبي يسيئك ما لاقيت
يا ريت، يا ريت
- أتقلب على جمر النار، واتشرد ويا الأفكار
النسمة أحسبها خطاك والهمسة أحسبها لقاك
- على كده أصبحت وأمسيت
وشافوني وقالوا اتجنيت
- ياريتني عمري ما حبيت
تواعدنى بسنين وأيام وتجيبني بحجج وكلام
- وتسلم وتمر قوام أو تخلف وتقول لي نسيت
يا ريتني عمري ما حبيت.
قصيدة: إلا البلد يا ولاد مالها مقلوب حالها
إلا البلد يا ولاد مالها مقلوب حالها
- في عز عصر استقلالها شبعت تشخير
كانت صلاة النبي أحسن من كده و اتخن
- والعملة ماشية عدل معدن ورغيفها كبير
أما البلاد الدون ربحت مصر اندبحت
- غاية ما في التهويش صبحت جرايدها كتير
يادي الغلا اللي ورانا بالخرازانة
- والمقرعة لما هرانا وبقينا حمير
أول ما تسمع يا رمالي بخبر خالي
- تبات وتصبح طوالي ناوي التصغير
والفرانين كل معلم جلف مبلم
- وصدغه في الأزمة يتلم ولا صدغ مدير
طحن البلاطة وسكتنا ياللا اهتكنا
- وحطنا فقعر التكنة وخلطها شعير
أعوذ بالله، دي الأروام ولا دي الأغنام
- اللي ما ينجح فيها كلام إلا بفواتير
ماحد حقه الحرق بجاز غير الخباز
- وقلع عينه بالمخزاز ابن الخنازير
نهار ما تبقى الناس في هلاك يبني الأملاك
- ويجيب مصاغ لمراته هناك و جنله حرير
وبحق ليه القمح يا ناس ينشال في كياس
- ويروح لأبو بيصل ومداس والتاني أمير
قال العمى يعمي الأبعد على رأي أسعد
- دي بلادك أنت يا حاج أحمد ياما فيها فقير
ما أصبحوا أهل طبنجة وروم كمنجة
- واتعلموا يمزوا برنجة وخس وجرجير
زرع الأراضي اليوم طيب بكره يخيب
- والظاهر الفقر قريب جاي في مواسير
نهار ما تسرح بصواني عال يا سوداني
- ويقول معانا القباني فين القناطير؟
قصيدة: ليه أمشي حافي وأنا منبت مراكيبكم
ليه أمشي حافي وأنا منبت مراكيبكم؟
- ليه فرشي عريان، وأنا منجّد مراتيبكم؟
ليه بيتي خربان، وأنا نجّار دواليبكم؟
- هي كده قسمتي؟
الله يحاسبكم!
- ساكنين علالي العتب، وأنا اللي بانيها
فارشين مفارش قصب، وأنا ناسج حواشيها
- قانيين سواقي دهب، وأنا اللي أدور فيها
يارب ماهوش حسد
- لكن بعاتبكم
من الصباح للمسا، والمطرقة فيدس
- صابر على دا الأسى حتى نهار عيدي
ابن السبيل انكسى، واسحب هرابيدي
- تتعروا من مشيتي
واخجل أخاطبكم
- ليه تهدموني وأنا اللي عزكم باني
أنا اللي فوق جسمكم قطني وكتاني
- عيلتي في يوم دفنتي ما لقيتش أكفاني
حتى الأسيّة وأنا راحل وسايبكم.
قصيدة: من العيون يا سلام سلم شوف واتعلم
من العيون يا سلام سلم شوف واتعلم
- تحت البراقع تتكلم والدنيا نهار
عيون تقولك قصدك إيه بتبحلق ليه
- ما لكش شغل تعس عليه يا راجل يا حمار
وعيون تقولك روح يا رزيل يا بو دم تقيل
- يا باي كبه في المخاليل يا ما هما كتار
وعيون تقولك أنا حبيت ياللا بنا البيت
- وعيون تقول إن شاء الله ما جيت أنا رايحة الزار
وعيون تقولك بالمحسوس أنا عايزة فلوس
- وإن شاء الله حتى تحوس وتدوس أنا عاملاه كار
وعيون تقولك امشي يا واد أنا أم ولاد
- وعيون تقولك عندي معاد ويا السمسار
وعيون بسر الحب تبوح كدا بالمفتوح
- وتعرف القلب المجروح ما عليهش ستار
وعيون تسبل فوق الخد دي جد في جد
- وعمرها ما تكلم حد عيون أحرار
وعيون تحقق فيها بشوق تهرب على فوق
- بتقولك ابعد عني بذوق نظراتك نار
وعيون ما تعرف زعلانة أو فرحانة
- صباح مسا أهي سهتانة صاحبة أفكار
وعيون لها ضحكة في وشك بس تغشك
- وتبص من تحت اليشمك تلقى المنقار
وعيون كدا يبقم ساهتين صفر وباهتين
- بالشكل دا عيون الخاينين تضرب بصفار
وعيون تبص وتتسفلق واقفه شلقلق
- وعيون تبربق وتبحلق عايزين مسمار.
