محتويات
قصيدة: يا مدور الهين ترى الكايد أحلى
يقول الشاعر خالد الفيصل:
يا مدور الهين ترى الكايد أحلى
- واسأل مغني كايدات الطروقي
الزين غالي لكن الأزين أغلى
- ولكل شراي بضاعه وسوقي
النو عالي والسما فوقه أعلى
- ولا فاق علم جاه عالم يفوقي
والصعب هلا قلت يا صعب سهلا
- دامك تبيني فانت يا صعب شوقي
أحب عسف المهرة اللي تغلى
- وأحب أروض كل طرف يموقي
وأحب أسافر مع سحاب تعلى
- وأحب فوق الغيم لمع لبروقي
وأحب أساهر بدري اللي تجلى
- وأرسم شعاع الشمس عند الشروقي
يامن على ثاير فوادي تولى
- خلك على قلب الكرامة شفوقي
أكرم عزيز بالعمر ما استذلا
- يسوق عمره للمشاريف سوقي
اخترتك من الناس للقلب خلى
- يا حيثك مرادي وكيفي وذوقي
ما رحت أدور كل زول تحلى
- لولاك تسوى ماعطيتك خفوقي.
قصيدة: مرتاح أحبّك ولا علّمت حتى
مرتاح أحبك ولا علمت
- حتى أنت عييت أبين لك
والبارحة يوم أنا سلمت
- شكيت لو عيني تدلك
برق لمع بالعيون وخفت
- مواجع القلب توصل لك
عساك في ناظري ما شفت
- كيف المعاليق يومن لك
من خوفتي لا احترق جنبت
- هربت من شمسك لظلك
أخشى عليك الهوى لو طحت
- ما تلني يمك يتلك
أبي قليلك ولا حصلت
- بعضك تركني مع كلك
ما أدري صواب أو خطا ما قلت
- إنك حبيبي وانا خلك.
قصيدة: يا قصيدة عمري الّلي تكتبيني
يا قصيدة عمري اللي تكتبيني
- كل يوم حرف من نغمة هواك
ارحميني يالهوى والا اذبحيني
- لا تخليني معلق في سماك
كل ما أخذتي عمر مني عطيني
- لحظة من ساعة داخل حماك
الحياة أشوفها والموت فيني
- وأعذب اللي بغاك ولا لقاك
أسهر الليل وقمر طيفك بعيني
- والشعاع الصبح يوقظ بي رجاك
أن حدي حادي تولاني حنيني
- وإن عرض طيفك على طرفي بكاك
كيف هذا من هوى قلبي يجيني
- يا أرق الناس قولي وش دهاك
لو تماديت بملامي سامحيني
- قد تماديت بذبحي من طغاك.
قصيدة: ما هو صحيح القلب للقلب شاهد
ما هو صحيح القلب للقلب شاهد
- لو هو صحيح أصبحت مفتون فيني
بيني وبينك حب من قلب واحد
- ليته يجيك من الهوى ما يجيني
وليتك تعرف الشوق لي صار واجد
- وليتك تعرف أوجاع كثر الحنين
ما قد شكيت الحر والجو بارد
- ولا سهرت بليل طول السنين
ولا مشيت العمر والحظ قاعد
- ولا تحديت الألم والونين
أضحك وأنا لجروح الأحباب جاحد
- أداري المكنون عن كل عين
ما ودي أفرّح على القلب حاسد
- وإلا عذابي في عيوني يبين
شيٍ يهون وشي بالحيل كايد
- ياكود تجريح الخفوق الحزين
من عانده وقته وقلبه يعاند
- مالت به الدنيا يسار ويمين
غرني أمثال العرب بالشواهد
- يبيك قلبي وأحسب إنك تبيني.
قصيدة: أستطيع أمنع لساني لا يقول
أستطيع أمنع لساني لا يقول
- وأستطيع أمنع عيوني لا ترى
وتستطيع أمنع يديني لا تنول
- وأمنع أذني عن سواليف الورى
لكن المشكلة أنا وش لون أحول
- دون فكري لو خيالي به سرى
شارد أفكاري على رغمي تجول
- كلما عن الهوى وإلا طرى
كل نجم للخيال أصبح ذلول
- بالفلك طواف لا ضاق الثرى
شاغلي يا راعي الطرف الخجول
- باع حبك في خفوقي واشترى
يا ربيع القلب في كل الفصول
- ورد حبك فاح عطره وازهرا
مرني طيفك على العادة عجول
- عز طيفك مثلما عز الكرى
ما نفع تحذيري القلب الجفول
- يرقد الخالي وعيني تسهرا
باسألك قل لي ولو فيها فضول
- كيف تذبح من يشوفك ما درى.
قصيدة: الله أكبر كيف يجرحن العيون
الله أكبر كيف يجرحن العيون
- كيف ما يبرى صويب العين أبد
أحسب أنه الرمش لا سلهم حنون
- أثر رمش العين ما يأوي لأحد
يوم روّح لي نظر بعينه بهون
- فز له قلبي وصفق وارتعد
لفني مثل السحايب والمزون
- في عيوني برق وبقلبي رعد
نقض جروحي وجدّد بي طعون
- قلت: يكفي قالت عيونه بعد
وانعطف هاك الشعر فوق المتون
- وانثنى عوده وقفى وابتعد
أشغلتني نظرة العين الفتون
- حيرتني بالتوعد والوعد
هي تمون العين والا ما تمون
- اللي خذت قلبي وقفت يا سعد.
