النكت المصرية
يمتاز المصريون بروح الدعابة والمرح، ويظهر ذلك جلياً في النكات التي يتبادلونها فيما بينهم، إذ يعتبرون النكت المضحكة من الأشياء المسلية لأنها تدخل السعادة والبهجة والشعور بالسرور إلى القلب، وفي هذا المقال بعض النكت المصرية المضحكة.
أجمد نكت مصرية قصيرة
- حرامي دخل يسرق بيت لما إجا يطلع شافه الولد الصغير، قاله تسرق كتبي وشنطتي معاك ولاّ أصرخ وأصحي الناس.
- سألوا واحد محشش: مين أهم الشمس ولا القمر؟ رد القمر طبعًا، بيطلع ينور لنا بالليل والدنيا ظلمة، إنما الشمس بتطلع بالنهار والدنيا نور أصلًا.
- محشش يسأل محشش تتوقع الجمعة يوافق آخر الشهر؟ رد عليه: لو ضغطنا عليه يمكن يوافق.
- واحد ومراته متخانقين فبطلوا يكلموا بعض فكتب ورقة صحيني الساعة 6:30 علشان عندي شغل، وحط الورق على السرير ونام صحي الساعة 10:00 فلقى ورقة مكتوب عليها الساعة 6:30 يلا إصحى.
- محشش سأل صاحبه المحشش: إيه أخبار أبوك؟ بعدين افتكر إن أبوه ميت فكمل بسرعة: لسه في نفس التربة؟
- مسطول دخل محل بقالة وخرج يضحك، سألوه بتضحك ليه قال لهم عطيته جنيه وما اشتريت شيء.
- واحد معاه عربية قديمة وعاوز يبيعها ومش عارف، فصاحبه قاله حط عليها علامة مرسيدس وهي تتباع فورًا، راح عمل كدا بعد أسبوع صاحبه بيسأله بعت العربية ولا لا؟ قاله إنت عبيط حدّ يبيع عربية مرسيدس.
- طالب محشش كان في اختبار مادة الكيمياء، وجاء سؤال عن ما هو الشيء الذي لا يذوب في الماء؟ فأجاب السمك.
- راح طفل لأبوه المحشش وقاله أنا عايز مدرس خصوصي في البيت.. فرد عليه أوعدك لو نجحت السنادي هجيبلك واحد.
- واحد غبي بيلعب بالقنبلة وبيحدف من إيده اليمين لإيده الشمال، فجي واحد تاني يقوله خلي بالك لتنفجر فيك.. فرد عليه متخافش يا عم أنا معايا واحدة تانية.
- واحد مسطول لقى واحدة ست ماسكة فيها النار فراح قالها منورة يا حجة.
- راح راجل للدكتور فسأله أنت عندك إيه؟ قاله عندي عيلين وخروف.
- واحد قاعد يحمد ربنا أنه مش صيني.. قاله صاحبه ليه كده؟ قاله أنت غبي أنا معرفش ولا كلمة صيني.
أجمد نكت مصرية طويلة
الطفل: ماما عاوز أشرب.
الأم: أنا بطبخ، قوم هات لنفسك تشرب.
الطفل: بتفرج على التلفزيون، هاتيلي أشرب وارجعي تاني المطبخ.
الأم: وبعدين بقى معاك، هاجي أضربك.
الطفل: طيب وإنت جاية تضربيني هاتيلي معاكي أشرب.
واحد فتح محل فراخ في مصر، جاله مفتش التموين وسأله بتأكل الفراخ إيه يا جحا؟
قاله رز.
قاله المفتش مصيبتك سودا هو حد لاقي الرز؟ غرامة 100 جنيه.
تاني يوم، رجع سأله: بتأكل الفراخ إيه يا جحا؟
قاله قمح.
قاله المفتش مصيبتك سودا هو حد لاقي القمح؟ غرامة 100 جنيه.
ثالث يوم، بتأكل الفراخ إيه يا جحا؟
قاله ذرة.
قاله المفتش مصيبتك سودا هو حد لاقي الذرة؟ غرامة 100 جنيه.
رابع يوم، بتأكل الفراخ إيه يا جحا؟
قاله بدي كل فرخة جنيه وهي تآكل اللي هي عايزاه.
مرة طالب هندسة دخل امتحان شفوي فالدكتور بيسأله:
بتركب إيه وانت جاي الكلية الصبح؟؟
الطالب: بركب الأتوبيس
الدكتور قاله: حلو أوي.. لو الدنيا حرّ في الأتوبيس هتعمل إيه؟؟
الطالب: هفتح الشباك.
الدكتور: جميل احسبلي بقا كمية الهوا اللي داخل الأتوبيس وهو ماشي على سرعة 60 كيلومتر في الثانية.
طبعا الواد معرفش والدكتور سقطه بالمادة ..
فهو خارج قابل واحد صاحبه فقاله على السؤال ودخل للدكتور بعده
الدكتور للطالب التاني: بتيجي الكلية بإيه الصبح؟؟
الطالب: بعربيتي.
الدكتور: طيب لو عطلانة؟؟
الطالب: بكلم صاحبي ييجي ياخدني بعربيته
الدكتور: طب لو مش موجود؟؟
الطالب: بخلى بابا يوصلني
الدكتور: طب لو وراه شغل؟؟
الطالب: بركب تاكسي وخلاص
الدكتور: طب لو ملقيتش تاكسيات؟؟
الطالب: بركب الأتوبيس وأمري لله .. هو يسترها بقا من عنده.
الدكتور: حلو.. لو الدنيا حرّ في الأتوبيس هتعمل إيه؟
الطالب: هقلع الجاكيت
الدكتور: طب لو حر أووووي؟؟
الطالب: هفتح زراير القميص.
الدكتور: طب لو حر جدًا جدًا.
الطالب: هقلع القميص
الدكتور: قاله طب لو مش قادر تستحمل وخلاص هيغم عليك وقدامك شباك؟
الطالب: بص بقا أنا ممكن أعمل أي حاجة بس ما افتحش شباك الأتوبيس.
