طلال الرشيد
طلال بن عبد العزيز بن سعود بن عبدالعزيز الرشيد، شاعر سعودي ولد سنة (1962م) بمدينة الموصل في العراق ، ولقبه (الملتاع )، له العديد من القصائد سأضع بعضها هنا.
قالت قدر
قالت قدر وأقول يومك تبيني
غصبن على الدنيا يدك في يديني
لا تظلمين الوقت وش ذنب الأيام
لا تظلمين الحظ لا تظلميني
غديت ما بين أرجا فيك واليأس
هذا يبي مني وهذا يبيني
إن قلت شمت وخاطري طاب كذاب
وإن قالت أبيك أرخصت نفسي بعيني
خيرني أمري بين أصعب خيارين
موتي أنا أو موت الحساس فيني
لكن زماني المر علمني أني
أموت محني لجل قلبي جبيني
والله ما تلقين حبي مع الناس
روحي وها لأيام بينك وبيني
العواذل
حبيبتي كل العواذل تشابه
قلبٍ ظلام ووجه يشبه للأصحاب
ولا ما غدى لك صاحبٍ ينحكى به
لا تسمعي أن كان لك قلب وأحباب
إلى مشيت الدرب يلهث سرابه
وإلى سكنت الدار ناداني الباب
وشلون أنام وهم قلبي صوابه
والشوك ينبت بين جفنين وأهداب
تعبت امني .. الأسئلة بالإجابة
وانطر شروق الشمس والشمس بغياب
وتعبت أناظر والمعنى عذابه
أنك بعيده والملا دونك حجاب
اجمع كلام وما أعرف الإجابة
وعندي شعور صدق والوقت كذاب
كل النجوم اللي أمطرت من سحابه
حبيبتي دمعك جرح قلب وأتراب
واللي وقف ما بين بابي وبابه
قلبٍ ظلام .. ولابس ثوب الأصحاب
باقي الخلق في كف
انتي بكف وباقي الخلق في كف
متعليه في وسط قلبي ولك شان
في غير وصلك مالقلبي ترى شف
محتاج لك يا نور عيني وشفقان
لا جابوا اسمك صرت أنا تقل مختف
مالي على نفسي الى اطروك سلطان
من غير حبك غضت عيوني الطرف
ياللي جمالك صار للزين عنوان
أريد أنا قربك ترى يا غذا الحرف
وإن ما حصل موتي ودنياي سيان
جتني
جتني وشافتها عيون حايرات
ذا شعاع الشمس أو هذا سناها
ضاعوا اللي جوا معاها مسيرات
وأقبلت تمشي تقل محدٍ معاها
ياسنا الفضة وياجيد المهات
يا شذى نبت الخزامى في وطاها
قلت كن بوجنتك زهر النبات
قالت إن الرمش يجرح لي صفاها
تجرح الظلما عيون ناعسات
سلهمت وأغضت تغطرس في بهاها
حققوا بالشوف في لون الشفاة
هو خذا منها الشفق والا عطاها
ولو ظلام الليل يعطينا ثبات
فيه من لون الشعر والا كساها
كيف أباصف زين كاملة الصفات
كيف أباصل في حروفي منتهاها
ذكرى الفراق
اليوم ذكرى الفراق ومرت أول سنة
اليوم لي عام متغرب وحيد وحزين
اليوم أنا ضيف جرحي جيت باطمنه
أني جمعت الدموع وجبت أمانة أمين
ما يجرح الصادق إلا غدر من يامنه
لا جت من أحباب قلبك لا تلوم السنين
مليت من هالاماني دام مهي ممكنة
لا هي تحقق ولا ياسي بوجهي يبين
لوين أنا وانت مثل الشمس والأزمنة
مع كل صبحٍ يجددني لشمسك حنين
لا قلت أحبك أحبك كنها دندنه
أو كنها وردةٍ ما بين أصابع جنين
يا أجمل الناس لك بين الملا هيمنة
كثير غيرك ولكن مين مثلك و وين
يا عاذلي خذ عيوني يمكن تثمنه
تشوف عيبه وانا أشوفه ملاك حسين
أمس افترقنا وانا احسب مرت أول سنة
يا طولها ليلة الفرقا سنة للحزين
