شعر حب خليجي

قصيدة: يا حبيبي فيك ظني ما يخيب

يا حبيبي فيك ظني ما يخيب

لو حصل من بيننا صد وجفا

شمس حبك في عيوني ما تغيب

وفي حنانك يا بعد عمري وفاء

فيك معنى الحب يا روحي يطيب

صادق شوقك وشوقي صفا

لو تروح بعيد من قلبي قريب

في غرامك هام قلبي واكتفاء

في غيابك مشتعل مثل اللهيب

ومن عرفتك شوق قلبي ما طفاء

صدق إني وافي يا أغلى حبيب

صادق ما فيه مثلي بالوفاء

قصيدة: بنت كحيله

قال خالد الفيصل:

بنت الكحيله مهرتي

وخيالتي من كل أصيل

ألقى عليها طربتي

بين المعنق والشليل

صدر وقطاة فلوت

العنق والساق الطويل

وقع الحوافر نغمتي

وحداتنا رجع الصهيل

أبوي وجدي قدوتي

لو ما لهم عندي مثيل

بالدين تفخر عزوتي

والرمح والسيف الصقيل

ماكر حرار ديرتي

ما في هل العوجا ذليل

قصيدة: مهما يقولون

قال نواف بن فيصل:

مهما يقولون مهما صار مهما تم

أنت البدايات وآخر ساحل ومينا

في هرجة الناس بالعذال لاتهتم

لو هم يحسون فينا ما حكوا فينا

ماعقب شرب الصبر والمر والعلقم

شي على طاري الفرقا يودينا

حنا اجتمعنا وشمل العاشقين التم

خضنا حروب الهوى فزنا وردينا

أهواك ما هي مواويل بها اترنم

ترى المواويل هي اللي تغنينا

منا الوفا يا وفي الروح يتعلم

وكل التعابير تبحر من شواطينا

حبيب عمري حياة القلب خل الهم

تقسي الليالى ولكن ما تقسينا

وإن كان جدت جدايد حبنا اقدم

ولا عاش راسٍ على الدنيا يبكينا

قصيدة: إحساسي غريب

قال طلال الرشيد:

الليله إحساسي غريب

عاشق وأنا مالي حبيب

حبيت كل الناس لاموني

حبيت كل أحبابي باعوني

قلت أحب الحب أحسن

قلت أحب الحب أضمن

لا أحن ولا أتوه ولا بعد في يوم أحزن

رضيت بأقداري ونصيبي

صرت محبوب الحبايب

وصار كل عاشق حبيبي

الليلة غير

شعوري غير

أشواقي غير

حتى الأغاني غير

صدري سما و إحساسي طير

بس طيفك ما تركني

ظل ساكن تحت جفني

كان وافي

كان يذكر وأنت جافي

أنت وينك؟

كان هذا الفرق ما بيني وبينك

جيتني تشكي الزمن

وجيتك أبي أدفى

لقيت في قلبي وطن

ولقيت بك منفى

قصيدة: لا يطول غيابك

قال خالد الفيصل:

لا يطول غيابك ثم آخذ عليه

لو تخليت عني عنك قلبي ما تخلى

العذر والتعلل والحكي ما نبيه

من تحرك فؤاده بالهوى ما تخلى

طبعي الصبر لكن وش عليه أرتجيه

من طويل الصبر يعقوب وأيوب ملا

دامني حي عطني وش بقي نحتريه

ما بي دموعك اللي عقب موتي تهلا

ما بقي بالعمر مقدار ما راح فيه

كل مازل يومٍ يوم بالعمر ولى

ما يعرف الجمر مثل الذي يكتويه

أحد يدفا بناره وأحد فيه يتصلى

يا من القلب حطيته براحة يديه

ما رضى له مكان غير كفك محلا

كم تعذر وعيا عن هوى محتويه

لين طاح بيمينك بالغرام وتجلى

قصيدة: آخر الحب

قال طلال الرشيد:

كنت أحسب إني عرفت الحب قبل أعرفك

وعشقت قبل أعشقك واشتقت قبل ألتقيـك

وكنت أحسب إني لقيت أحباب قبل أوصلك

وأثري توهمت في غيرك وأنا كنت أبيـك

تعال نعطـش وتشربنـي وأنـا أشربـك

تعال قبل الوعد اجلـس معـي نحتريـك

تعال شفنـي وأنـا أستنـاك كـم أشبهـك

يطري علي ألف راي و راي وأحتار فيك

أجي مكان الوعـد والا أسبقـه انطـرك

وإلا آخذ الموعد اللـي يحتريـك وأجيـك

يا آخر الحب ذقـت الحـب فـي أولـك

ويا أول الشوق أقصى الشوق ما ينتهيـك

علمتني كيف أعرفك لين صـرت أجهلـك

ضيعتني فـي متاهاتـك وكنـت أرتجيـك

حبيـب الأحـلام يا بـعـدك ويا مقـربـك

حـرام يكفـي تبعثرنـي وأنـا أحتويـك

إن شفتك بحلـم صدقتـه وأنـا أتوهمـك

وإن شفتـك بعلـم كذبتـه إليـن أنتشيـك

أخاف أغمض عيوني وإن رمشت أفقـدك

وأخاف أفتح وتصبـح حلـم ولا ألتقيـك

قصيدة: يا هبوب الورد والفلي

قال زايد بن سلطان آل نهيان:

يا هِبوب الوَرد والفِلّي

مطْلع قاصِد مـن اديـاري

مرحبا بك عَدّ ما أِنهلِّي

مالسِّحِب غَيث أو ما ياري

أو مرحبا مليون بالخِلّي

الغضي لي لِه أنـا داري

لي حديثه إليه ايسلي

أو من أَشوفه إتزول لكْداري

هُوْ دوا لنَّفْس مِ العلّي

هَو حياتي او جنّتي أو ناري

الوزير إيصيح ويهِلّي

دَمعْ عينه سايلْ أو يـاري

يشتكي من كامِل الدِّلّي

من وليفهِ لَي خفى أوْ ذاري

عابر في محْملْ إْبشلّيِ

خاطفْ اّبنـاي وِيمـاري

سنِّة وِاْشَراعه إِمَّلِّي

مويتـه فـي بـرده إتبـاري

يالخِويْ كانك تبي اَلْخلّيَ

جـرِّب البنّـايْ للجـاري

واقْصِد اْلَمضنُون وإدَّلّي

خَابرنّكِ فطنْ في الـدّاري

أوْليْ شراتك نَبْه ما إيْزِلّي

لو ظَلام اللَّيْل غَـدَّاري

لَي لَفيته زاهي الحلي

لي ايرحِّبْ لَيـل وِانهـارِي

با يرحِّبْ بِك أو بيهلِّي

با إتحِسّْ ابرَاحـتْ أفكـارِي

مِثل ما إنْته كنت مِعتَلّي

به وِزا منِّك اُوْلُوْ ايـداري

فَرحتِك با تفِرحْ اْلَكلي

بينكمَ يَـا مانـع أسـرارايِ

قصيدة: إلا الهوى

قال بدر بن عبدالمحسن:

أبعتذر.. عن كل شيء..

إلا الهوى… ما للهوى عندي عذر…

أبعتذر.. عن أي شي…

إلا الجراح… ماللجراح إلا الصبر..

إن ضايقك إني على بابك أكر..

ليلة ألم… واني على دربك مشيت عمري وأنا

قلبي القدم...

أبعتذر… أبعتذر... كلي ندم...

عن كل شيء.. إلا الهوى..

ما للهوى عندي عذر...

اتصدقي... ماخترت أنا أحبك..

ما أحد يحب اللي يبي..

سكنتي جروحي غصب..

يا حبي المر.. العذب...

ليت الهوى وانتى... كذب

كان أعتذر لك عن هواي..

وما أقول أنا كوني معاي..

إن ضايقك أني على بابك أمر..

ليلة ألم...

وإنى على دربك مشيت عمري وأنا..

قلبي القدم...

أبعتذر.. أبعتذر.. كلي ندم..

عن كل شيء.. إلا الهوى..

ما للهوى عندي عذر..

الله كريم.. حبك.. يكون..

همي القديم..

وجرحى القديم...

والله عليم .. يا أحلي العيون..

إن الفراق.. جزا الفراق..

أبوعدك.. كان الطريق بيبعدك..

بامشي بطريق..

وكان الحجود بيسعدك...

ما لي رفيق..

أبجمع أوراق السنين.. وأودعك..

كان الفراق اللي تبين... الله معك