محتويات
قصيدة: أريد أعلن حداد وللعشك ما عود
- أريد أعلن حداد وللعشك ما عود
- وأريد أنساك ونسى البينك وبيني
- وشك دفتر غرامك خاطر إنه أنساك
- ودير الوجه عنك من تلاكيني
- ما ريدك بعد لو انت روحي اتصير
- وما ريدك لون من موت تحييني
- ملح بعيوني أحطن ونسة حتى النوم
- أخافن بالمنام طيوفك تجييني
- إذا شافتك عيني وفرحت بملكاك
- والله أتبره منهه وهاي مو عيني
- وإذا صافحك جفي بحجة الخملان
- أكص اثنين أديه يساري ويميني
- وإذا كالولي حبك يسري بالشريان
- ثق بالله أكطع كل شراييني
- وإذا صاير شمس أنه أبقه دوم بليل
- وما ريد الضوة وبلظلمه خليني
- تذكر من لكيتك والعطش وإليك
- وكلتلي امعود أترجاك روييني
- عصرت اجفون عيني وشلييت دموع
- وشربتك بديه وانت تدرييني
- ومن مرني العطش صرت أنت جربة ماي
- كصدتك معتني ومديت جفيني
- وأنت بكل وكاحة وكل صلافة عين
- درت بجفوفي سم وردت تنهيني
- تذب نفطك عليه وأنه بيه النار
- وتتحمه اعله ناري و ما تطفيني
- وصرت محبس بديك وكمت بيه تسوم
- ساعة تبيع بيه وساعة تشريني
- أظل خصمك وفضحك حتى من أتموت
- على كبرك أخطن بايك اسنيني
قصيدة: من ياهي أعذرك
من ياهي اعذرك وأنت ما معذور
سيفك هد علي بساعة الشدة
حسبتك تحبني وجبت بيدي الروح
بعدها ابنص اديه وكمت تتعده
ردت مره أجربك وأنتخيك بيوم
على كلبي أنتخيتك بلكن أترده
وكح كتلك وكح ويريد أحب بذات
شجعته ع إلي وتوكف بسده
مرات التحبه تشوف منه أشكال
وتخلقله الأعذار دكول مو قصده
وتصد كل الحجي والنصح من الناس
وتتحمل ذنوبه وكل خطأ عنده
لبس يفاجئك يلبس جلد ثعبان
ومفصل عليه وجايبه بكده
ما نادم عليك الراح خلي يروح
ولك صارت قديمة الماي وتبده
بس نادم علي شلونه أصدك بيك
ونادم ما أخذت العبرة من وحده
وهن أهواي صارن ما تبت عالصار
يا كلبي شيتوبك كافي وتهده
غيمة من الدمع يزرعها وسط العين
وأنت ورود حمرة وتزرع بخده
قصيدة: يا معود تره الكلك بعدني ارتاحلك
- يا معود تره الكلك بعدني ارتاحلك جذاب يا معود
- وجهات النظر تختلف باللحظات
- مو لان رمده العين لان شوف الكلب ارمد
- وعزيز الشمع بس بالليل ومن ينطفي كلهه أضوج
- مو حبًا لأن كلشي يصير أسود
- يا معود طبع سجين أنه طبعي
- شما أضعف عليك اشتد
- يا معود أنه ما نا جرك يا باب
- الله يساعد النجار بوجه الباب من ينرد
- كبل جنت انه دايخ بيك اموت عليك
- وتردد عليك وعلي تتردد
- هسه ما أجي ومن تجي بشارعنه
- إذا مفتوح بابي لوحده ينسد
- يا بلبل ربه وما غردت فد يوم
- وبلبل مشتره وللمشتري غرد
- يا معود صحيح إنته حلو كلش
- حلو تخبل حلو بلاعد
- وحلو طبعك طبع رطبه تصير أحله
- شما حر الوكت يشتد
- بس أنا ضجت منك لان حبوك مدري شكد
قصيدة: شما أقرب عليك
- شما اقرب عليك
- اتزيد حسراتك
- اذا خايف احرجك
- كلي ليش اتخاف؟
- ما ريد أنا أصبح
- سبب مأساتك
- احسب للطريق، وشوف دربك زين
- بس أنا أعتقد
- حاسب حساباتك
- مرات أني أشوفك
- قمه بالأشواك
- ومرات أحس كلبك
- عكس نظراتك
- أشوفك ترف، وأطمع ع الترافة البيك
- أجيك وتنكلب قاسي بعلاقاتك
- يـا (حبيبي) بالكرم
- وأكثر بعد للناس
- بس وياي تبخل
- ليش ساعاتك
- تلعب على اجروحي
- وتضحك ومرتاح
- وأنا ابطيبة كلب
- واضح ويه غيري
- وغامض أنت وياي
- أتمنى أني غيري وأحوي ضحكاتك
- بس راح أني اعوفك
- وانشغل بالروح
- وما تلكي من يمسح غيري دمعاتك
قصيدة: اصبر الروح بيش وأنت بيه الروح
- اصبر الروح بيش وأنت بيه الروح
- وإذا تطلع أظلن بس جسد خالي
- لكيتك من جنت ما لاكي كل الناس
- أنت أول محب، وأنت صرت تالي
- يلكلك محبة وانت أحن مخلوق
- معقولة الحمامة اتصير كتالي
- صح ماكو بجمالكاني أدري بهاي
- وروجه رقتك ما كظها أي جالي
- حرام عليك تزعل ونته الصوج
- أجيك أنا أعتذر وبلا ذنب خالي
- تزعل ليش
- غالي وكلشي عندي وما أهدك دووم غالي
- وهسه حبك جيف صرت غالي
- أحسك تختلف عن كل الناس
- بعيوني أشوفك علنجم عالي
- وأشوفن دمعتك ما جنها تنزل ماي
- ذهب تنزل دمعتك تجدح اتلالي
- إلك بستان عمري بكل ثمن مزروع
- راضي بكلشي منك كلشي يحلالي
- أجيك ومن أرد فارغ أرد للغير
- وعنب بس أعله مودك تارس أسلالي
