محتويات
قصيدة لمن غربلت كل أصدقائي
تُنسب هذه القصيدة للشاعر العراقي حسين الساعدي، ويقول في أبياتها:
عاين عالنتيجه الطلعت ابهاي!
لَمن غَربلت كل أصدقائي
جِنت الهم مُطَر وبشحة الماي
لا صيفِ اليكِضني إولا شِتائي
وأتنقى الصَديق اليمشي وياي
وتعَبني إشكِثر هذا إنتقائي!
وبكل موزمه و تلكاني مَشاي
وأبد ما قصر إبهذا إنتمائي
كلت خليني أغربل ياهو رَجواي
وعن من أبتعد والمن بقائي!
وغَربلت ابوقت وموازه دنياي
شفت صَدمات هَدت كِبريائي
شفت الجنت أظنه قلعة بالراي
طلع هالقلعه ما ثابت هَوائي!
وشفت الكال بَس اتصيح لَفاي
صار أخرس ولا يسمع نِدائي!
وذاك اللي حلف يوصَلي دماي
غَلس جنه ما شايف دِمائي
وطلع ذاك الصَديق البَوَخ إهواي
ولا جَنه عِرف ساعة بَلائي
وين أقرب الناس الجانوا اوياي
تِبَروا مني صرتهم وَبائي!
واحد جنت أظنه ايجامل اعداي
ولا حَسبته يهتم العَزائي
طلع هو الأصل من جيته شكاي
ذَب روحه كبل روحي فِدائي
طلع بيهم وَفي وتعنه عَناي
بس هَالوفي خَجلني إبوَفائي!!
جنت اعتقد نفسي وَحدي وَفاي
طلعت اصغير كدامه إبولائي
قصائد للشاعر حسين الساعدي
من القصائد الأخرى التي تنسب للشاعر حسين الساعدي:
أمي تطلب ملح
امي تطلب ملح من بيت الفقاره
لكن ابهذا الطلب اجمل عباره,,
عود محتاجيهم احنه,,
ابحجة امخلص ملحنه,,
,, حتى لو طلبوا أكل عادي اعتباره,,
اتكول يامرخص طلبكم
احنه هم طلبينه منكم,,
الجار
ينطي
وياخذ
وحقه اعله جاره!
امي كدام اليتيم
اتكلي عمه
أبد متناديني يمه
اتخاف
هالجلمه ,, تلجمه,
لو سمعها ,, ويذكر امه!
مره يمها اتعاركينه انه وصديقي
القميص الجان اليه
ايكلي لا هذا قميصي!
أمي كالت
أحكم ابحك
والرفض هالحكم ينطك,
أدري باأمي
اشراح تحكم!
انقهرت الثوبه المشكك,,
كالت
انته
الجذب عندك
وصاحبك حجيه حقيقي!
ونَزَعت ثوبي ابطريقي
ولبست ثوبي الصديقي
عاتبتها؟
وذكرتها!
انتي شاريته االيه
اشلون ما يبقى عليه؟
كالت اسمعني
ييمه
ااااالعازه غمه,
وانته عندك
واحنه بالعازه نسندك
واعرف انته صاحب الحك
وصاحبك كلش فقير وعاينت دمعاته تشهك!!
هيجي امي احساس عدها
لاجل
دمعات اليتامه,,
اتطلع الصوج ابولدها!
العشك جذاب
العشك جذاب
بس وكت الجذب ينجاب
ياهو الشاف
قيس ايحب
يمشي وبالاشعار ايذب!
اصلا هيه
كالتها
وليلى جانت اتجذب.
واحنه امصدكين
الكال
نضرب بيهم الامثال
وينه الكال!
حتى انشوفه وانسئله
صدك عنتر يحب عبله!
صدك بَيض بريق السيف
حتى ايبيض ابشكله!
لان
هالجذبه مو سهله,
جميل ايحب بثينه اشلون
والخاطرها عاف اهله!
اصلا
جان مامرتاح
ويدور عله الزعله!
وجِذبت روميور وجوليت
خلت بالكلب عله
يشرب سم عله الاوهام
بالله هذا شتكله!!
حتى حمد
ذاك الليل
جَذب جذبه بالتفصيل
هو
الريل
بس دخان
ليش ايكول اشم الهيل!
خل ايكول اشم عطاب
ويكول
العشك جذاب.
هم اني
اشكثر جذبات
عندي ابفرت الدولاب
اجذب عله روحي اهواي
من كِتلها عندي احباب!
الصبح كلش
يحبوني
العصر راحوا
يبدلوني,
ويعشكون ناس اجناب.
ماجَن بدلوا
بانسان
جن امبدلين اثياب!
مره العشك
حاجيته
وحلفلي اباسم داحي الباب
كالالي انتظر بس يوم
اجيبن يمك الغياب
خلاني افز فزات
من الهوى ايحرك الباب
كل فزه التفز وياي
شايل بيها كومه اعتاب!
ثاري الهوى ابهل ايام
هم مثل العشك جذاب.
وحق الله
العشك جذاب!
كلنا ننتمي الهاي القبيلة
هله ابكل العراق وكل الاحرار
هله ابغدادنه الحلوه الجميله
هله بلنجف وبحيدر الكرار
هله وبكربله الحره الجليله
هله باهل السماوه واهل ذيقار
هله ابميسان والبصره الكحيله
هله بلقادسيه واهل الانبار
هله بديالى والنسمه العليله
هلا بالموصل وياهيبة الدار
هلا بلكوت والحله الأصيله
هلا بدهوك والطيبيين الأبرار
وصلاح الدين والكفه الثجيله
هلا باربيل وتعناهه مشوار
سِلَيمانيه واجبال الطويله
هلا ابكركوك والسكان الاخيار
عدنه الطائفيه مستحيله
قبيلتنه العراق ازغار وكبار
وكلنا ننتمي الهاي القبيله
كلنا ننتمي الهاي القبيله
جرح ويفرخ جرح بالعافية
الله لا ينطيك هَستوهن غفن
ليش فززت الجروح الغافيه
كامن ابنص الكلب يَطافِرَن
جرح ويفرخ جرح بالعافيه
جرح ويحشم جرح وتحَلفن
شعلن النيران جانت طافيه
اجروحي بلثورات حيل اتأثرن
والخبر عاجل عله المتعافيه!!
كتبن ارحل والدموم اتناثرن
هالجروح الأبد ما متصافيه!
وأنه ماصدكت تَوهن هَودن
وحَرضَتهن كلمه منك دافيه!
هاي سنتين ابغيابك ما نسن
جَرَبت ماكو الطريقه الشافيه
والجروح ابيومي كله اتحزمن
لو يهيدن ساعه كلش كافيه
حاضرات ابكل وقت يتدربن
مايغيبن عالوقت متوافيه!!
ليش خليت الجروح اتسودنن
وخَبطت دنياي جانت صافيه!
هاكثر خطواتك الغيري مشن
وهاكثر وجروح الك ما خافيه!
وهاكثر وعيونك الشوكي نفن
وهاكثر وعيوني الك مانافيه
خايب اجروحي عليك اتعودن
ليش عينك بلمواكح لافيه
يكول الساعدي
يكول الساعدي والزمن دوار
يراويك الصحيحه والقبيحه
إخذ مني نصيحه ابهاي الاشعار
نصيحه وتستفاد إبهل النصيحه
إذا صارت غدر لتصير غدار
ولو كلمة وفي صارت شحيحه!
وابد لتبيع سرك ويه الاسرار
والودعك سره لا تبيحه!!!
لا تخذل دخيل اتعنه مشوار
ذب روحه على بابك جريحه!
تراه البيت بخته ابعتبت الدار
وإذا جاك البخت بالك تزيحه!
وإذا بايام ما جهبوك خطار
تعاين عتبتك ما مستريحه!!
عزيز النفس تبقه اشلون ماصار
تاج الراس وافعالك مريحه
وإذا دنياك صارت كلهه دولار!
انته اتباهه بالغيره الصحيحه
جم تافه ابتافه عنده مليار!
ساركهن ويضحك للفضيحه!
