قصيدة: يا ذكرى الغرام
فمان الله يا ذكرى الغرام وما مضى يطوى
- طويته مثل ما تطوى سفينة حزني شراعي
غدآ للدمع من عقبك بعيني غبشه ومضوى
- بعد ما راحت اوراق البريد وغادر الساعي
تذكرني الأماكن فيك واشتاقك تعب واخوى
- على بحة حكاك وضحكتك يا سيد أوجاعي
ما أذكر يوم ناديتك وردك كان لي أيوى
- تلبيني لو إنك ضايق وتلتف فـذراعي
تغامني وخذني ضامي للوصل ما يروى
- تكلم يا بعد كل العرب وأطرب لي أسماعي
إذا حبك بلى روحي هلا بالعشق والبلوى
- أجوع لشوفة عيونك ولا إنت بقادر إشباعي
أبيك وأعشقك وأشتاق وأغار بشغف وأهوى
- محطات الغرام وكل لقيا هزة أضلاعي
يعومسني غيابك كل ما هب أهوى علوى
- وكلامك مفرداتك أثرت فيني وفي طباعي
عليه بالحرام إني بغيت آموت بس أشوى
- عقب ما ضاق بي حزني وقمت أرتب أوضاعي
يقولون الدموع أضعف واقول إن الوداع أقوى
- إلى قد عينه بعينـي ولا جاء إلا لـّوداعي !!
يضيع الحكي ولساني من حبال القهر يلوى
- أنا في حلم ولا علم يا قلبٍ مهوب واعي
لو إن بعدك مرض يمديني أحمي الميسم وتكوى
- جروحٌ من جنابك يا الوليف ومالها راعي
رفيق العمـر وجروحي كبار وما بها ملوى
- تبي تقنعني بظرفك ولا لا تحاول إقناعي
ما أقول إن العمر من دون وصلك صار ما يسوى
- أقول إن الحياة بكبرها ما لأمها داعي
قصيدة: شفتك بعد غيبة
شفتك بعد غيبه.. وحاولت أحاكيك
- مهوب من قلبي ولا من جرأته !!
بغيت أقول / فلان وازريت أحاكيك
- وكني سمعت اسمي مع الالتفاته
فزيت من نومي وأنا أقول لبيييك
- وآثرك رويا .. في منامي وجاته
صفقت كف . وقلت يا حلم يشوويك
- جددت لي جرح ٍ هنى في مباته
يا اللي شريت البعد .. ما غاب طاريك
- حتى لو إن البعد .. سوا سواته
مهوب محزني .. على حاجةٍ فيك
- إلا إن قلبي شايف بك غناته !!
كن الطيوف تقول وشحال غاليك
- وآقول راح .. وما بقى إلا غلاته
لو إن ما جاني من الهم ياتيك
- كان المصلي ما حفظ وش صلاته
مريت شارعكم.. وصادفني آخيك
- واللي قطع كبدي .. حلاتك حلاته
بغيت الخبط من دعاياه وأدعيك
- واسمك وقف بين اللسان ولهاته !!
وبغيت أجيب العيد وأقول: يرضيك
- فاللي وصاتي له.. وضيّع وصاته
البعد شيّب خافق ٍ ميت فيك !!
- والى مشى خطوه عثر في عصاته
مشكلتي / إن قلبي يحبك ويغليك
- ومشكلتك / انك شخص عايش حياته
كثر الجفا .. نار .. وحطبها تغليييك
- خف الحطب .. لا تزيد نار الشماته
إن ما أحزنك جرح ٍ برجواه يدعيك
- ما عاد تفرق .. عيشته من مماته
قلبي وعمري كلها بين أياديك
- العمر فدوه.. لكن القلب هاته !!
وإن ما بغيت ترد قلبي ما أوصيك
- أحسن عزاه.. اإلى دريت بوفاته
قصيدة: بين استشارة جرح ومعاند نفوس
بين استثارة جرح ومعاند نفوس
- وبين الحسافه يوم صدات الاقراب
وبين العذاب وبين دمعات محبوس
- زنزانة الدنيا تحبسه ولا تاب
آخذ بعقلي بين الأرجاء وآحوس
- واقلب أوراق الخفا وافتح أبواب
امشي على خطه وتكتيك مدروس
- ولاهو بهمي أكسب أصوات وإعجاب
ويا فكري اللي تملك إحساس معكوس
- يا لعنيوك اليا متى وإنت غلاب
ويا قلبي اللي من عنا الهم متروس
- ما أبيك تضعف لا قدك عند الأجناب
لا شك أبيك تكون لعداي كابوس
- في عصر شعر كله فسرق وانهاب
ما دامك العالي تعليك ناموس
- خلك كذا كايد ويحسب لك حساب
علم هل النمات نقارة السوس
- اللي يزيدون الحكي زود واكذاب
صاحب وخاين صار لعداي جاسوس
- وصاحب فشى سري كذا دون أسباب
يا رب أنا في رفقتي ليه منحوس
- برحمتك ترحم صويب ومنصاب
لا جن ليل الهم هب لي الكوس
- كنها تذكرني مواعيد الأحباب
آجر صوتي واسحبه سحب منكوس
- من خاطر فيه الهواجيس تنتاب
وأنا بحبه ناحل القد ( مهووس)
- حبه يعذبني يا لبى التعذاب
ولو المحبه شي واقع وملموس
- ما شفت عاشق يشتكي هم واتعاب
لكن ما دامه شي فالقلب محسوس
- تبقى الحقيقه دونها ستر وحجاب
يا قطع كبدي قطعة الجلد بالموس
- لا صارت أفعال الرياجيل تنعاب
ما يربح اللي يذخر لوقته فلوس
- الرابح اللي يذخر لوقته (أصحاب)
